Програмата е интерактивна и поддржана со активни методи, практични вежби, работилници, искуствено учење и современи алатки, со цел учесниците да се запознаат со целокупниот процес на планирање и водење на бизнис – од развивање на бизнис идеја, преку изработка на бизнис план, до стекнување на вештини за управување со компанијата, како и стекнување на вештини за идентификација на можностите и справување со предизвиците кои произлегуваат од самиот бизнис и од окружувањето.

Наставните методи за реализација на програмата го поттикнуваат претприемачкиот дух, самоиницијативноста, тимската работа и креативноста на учесниците.

Програмата е составена од два модули, при што секој модул претставува едукативна целина која што се надоврзува на претходниот модул и обезбедува знаења и вештини поврзани со предметот/темите во модулот.

1. Првиот модул ги опфаќа претприемништвото, претприемачкиот процес и претприемачот.  Преку овој модул, учесникот ќе се запознае со претприемништвото и ќе го разбере претприемачкиот процес. Овој модул исто така ќе ги опфати карактеристиките на успешен бизнис, ќе ја поттикне креативноста и ќе им овозможи на учесниците да развијат претприемачки дух, способност за препознавање на бизнис можностите, способност да се справуваат со предизвиците на самиот бизнис, како и предизвиците кои произлегуваат од окружувањето, како и да дефинираат сопствена бизнис идеја за производи или услуги во контекст на основање на сопствен бизнис, способност за подготовка на бизнис план и способност за идентификување и определување на потребни средства за бизнисот.

2. Вториот модул од програмата се однесува на деловните вештини потребни за основање и водење на сопствен бизнис. Преку оваа едукација, учесниците ќе се запознаат со потребните вештини за успешно водење на секојдневните бизнис операции, со цел да идентификуваат кои вештини е потребно да ги развиваат или подобрат за успешно да го водат својот бизнис.  Овој модул ќе ги опфати круцијалните бизнис вештини како:

• Управување со финансии и трошоци
• Маркетинг,
• Продажба,
• Грижа за клиенти,
• Правни и законски аспекти,
• Деловна етика,
• Лидерство,
• Комуникациски и преговарачки вештини,
• Управување со човечки ресурси, проекти и време,
• Вмрежување (Networking)

Времетраењето на програмата е 3 (три) месеци, поточно 60 часа (1час = 60мин). Од вкупно 60 часа, 20 часа се предвидени за теоретска обука и настава во современо опремен кабинет/училница, 36 часа се за практична обука која ќе се реализира преку вежби и активности во кабинет/училница под менторство на обучувачите, 4 часа се предвидени за оценување.

Оценувањето ќе се одвива во три фази, односно првата фаза е писмен испит по завршување на теоретскиот дел од првиот модул, втората фаза е писмен испит по завршување на теоретскиот дел од вториот модул и третата фаза следи по завршување на практичниот дел од обуката и ќе опфати завршен испит кој подразбира презентација на изработениот бизнис план.

Учесниците кои успешно ќе ја поминат обуката, се стекнуваат со сертификат за “Претприемништво и деловни вештини” по верифицирана програма од ЈУ Центар за образование и Министерството за образование и наука на РМ.

Успешното завршување на оваа програма ќе ја подобри конкурентноста на учесниците на пазарот на труд и ќе ја зголеми можноста за самовработување преку отворање на сопствени бизниси.